"Хөшигийн хөндийн нисэх онгоцны буудал" ТӨХХК

Хөшигийн хөндийн нисэх онгоцны буудал ТӨХХК нь Монгол Улсын Засгийн газрын 2018 оны 05 дугаар сарын 23-ны өдрийн 150 дугаар тогтоолоор байгуулагдсан төрийн өмчит хязгаарлагдмал хариуцлагатай компани юм. Улаанбаатар хотын олон улсын нисэх онгоцны шинэ буудлын менежмент төслийг хэрэгжүүлэх хамтарсан хуулийн этгээдийн 49 хувийг эзэмшиж хяналтыг гүйцэтгэдэг. Зам, тээврийн хөгжлийн яам 66 хувь, Төрийн өмчийн бодлого, зохицуулалтын газар 34 хувь хувьцаа эзэмшинэ.

Компанийн үйл ажиллагааны зорилго нь нисэх буудлаар үйлчлүүлэгчдэд олон улсын стандарт, шаардлагын түвшинд хүрсэн, аюулгүй байдлыг хангасан, тав тухтай үйлчилгээ үзүүлэх, мөн нисэх буудлын хэвийн тасралтгүй үйл ажиллагаа явуулах замаар хувьцаа эзэмшигчдийн хөрөнгө оруулалтын өгөөжийг нэмэгдүүлэхэд оршино.